اسلام آ باد (ڈیلی مسلم ورلڈ) وزیر اعظم عمران خان نے کہا ہے کہ کراچی کے عوام کی ترقیاتی ضروریات اور
درپیش مسائل کا مکمل ادراک ہے،وفاقی حکومت اس حوالے سے اپنا کردار ادا کرے گی، کراچی کے عوام کو
ریلیف فراہم کرنے کے لیے تمام وفاقی اداروں کو ہدایات دے دیں گئیں ہیں، کراچی پاکستان کا اہم ترین شہر ہے ،
اس وقت درپیش ہنگامی صورتحال سے نمٹنے کے لیے تمام وسائل بروکار لائیں جائیں گے۔ تفصیلات کے مطابق
وزیر اعظم عمران خان کی زیر صدارت کراچی میں وفاقی حکومت کی جانب سے مختلف ترقیاتی منصوبوں پر
پیش رفت کا جائزہ اجلاس ہوا جس میں وفاقی وزراء اسد عمر، مراد سعید اور سینئر افسران شریک۔ گورنر سندھ
عمران اسماعیل کراچی سے ویڈیو لنک کے ذریعے شریک ہوئے۔ اجلاس کو صوبہ سندھ اور کراچی میں وفاقی
حکومت کے ترقیاتی منصوبوں پر اب تک کی پیش رفت کا تفصیلی جائزہ پیش کیا گیا۔ وزیر اعظم نے اجلاس سے
خطاب کرتے ہوئے کہا کے صوبہ سندھ اور خصوصاََ کراچی کے عوام کی ترقیاتی ضروریات اور درپیش مسائل
کا مکمل ادراک ہے اور وفاقی حکومت اس حوالے سے اپنا کردار ادا کرے گی۔ گورنر سندھ نے وزیرِ اعظم کو
کراچی کی تازہ ترین صورتحال کے بارے میں بریف کیا۔ وزیر اعظم نے کہا کہ کراچی میں سیوریج، نکاسی آب
اور پینے کے صاف پانی کی فراہمی کے حوالے سے جامع پلان، تمام اسٹیک ہولڈرز کی مشاورت کے ساتھ،
تشکیل دیا جا رہا ہے۔ وزیر اعظم نے کہا کہ کراچی کے عوام کو ریلیف فراہم کرنے کے لیے تمام وفاقی اداروں
کو ہدایات دے دیں گئیں ہیں۔ وزیر اعظم نے کہا کہ گذشتہ روز وزیر اعلیٰ سندھ سے کراچی میں حالیہ بارشوں
کے بعد کی صورتحال پر گفتگو ہوئی اور وفاق اور اس کے اداروں کی جانب سے ہر ممکن مدد کی یقین دہانی
کرائی ہے۔ وزیر اعظم نے زور دیاکہ کراچی پاکستان کا اہم ترین شہر ہے اور اس وقت درپیش ہنگامی
صورتحال سے نمٹنے کے لیے تمام وسائل بروکار لائیں جائیں گے۔
