موسمی بیماریوں کے دوران اینٹی بایوٹک کا غیر ضروری استعمال بڑھنے پر طبی ماہرین نے شہریوں کو خبردار کیا ہے کہ نزلہ، زکام، کھانسی اور گلے کی خراش جیسی عام بیماریوں میں خود سے اینٹی بایوٹک استعمال نہ کی جائے۔ ماہرین کے مطابق موسمی سانس کی بیشتر بیماریاں وائرس کی وجہ سے ہوتی ہیں جبکہ اینٹی بایوٹکس بیکٹیریا کے خلاف استعمال ہوتی ہیں، اس لیے وائرل بیماری میں ان کا استعمال فائدہ نہیں دیتا۔ ڈاکٹروں نے خبردار کیا کہ اینٹی بایوٹکس کا غلط یا غیر ضروری استعمال جراثیم میں مزاحمت پیدا کرسکتا ہے، جس سے مستقبل میں عام انفیکشن کا علاج مشکل ہوسکتا ہے۔ ماہرین نے شہریوں کو مشورہ دیا ہے کہ کسی بھی بیماری میں خود سے پرانی اینٹی بایوٹک استعمال کرنے کے بجائے ڈاکٹر سے مشورہ کریں اور تجویز کردہ دوا کی خوراک میں خود سے تبدیلی نہ کریں۔
