خوشاب بس کی بریک فیل کے واقعے میں ایک مسافر نے بروقت کارروائی کرتے ہوئے 25 سے زائد افراد کی جان بچالی۔ واقعہ پیل چوک کے قریب پیش آیا جہاں مسافر بس کے اچانک بریک فیل ہوگئے۔ پولیس کے مطابق بس ڈھلوان راستے پر جا رہی تھی کہ بریک فیل ہونے کے بعد گاڑی بے قابو ہونے لگی۔ صورتحال خطرناک ہونے پر ڈرائیور مبینہ طور پر چلتی بس سے کود کر فرار ہوگیا۔ خوشاب بریک فیل بس میں موجود ایک مسافر نے فوری طور پر ڈرائیونگ سیٹ سنبھالی اور گاڑی کو قابو کرنے کی کوشش کی۔
مسافر نے بس کا رخ پہاڑی کی جانب موڑ کر اس کی رفتار کم کرنے میں کامیابی حاصل کی، جس کے نتیجے میں ایک بڑے حادثے سے بچاؤ ممکن ہوا۔ پولیس کے مطابق واقعے میں 25 سے زائد مسافروں کی جان بچ گئی۔ ضلعی پولیس افسر خوشاب ڈاکٹر عمارہ شیرازی نے بہادری کا مظاہرہ کرنے والے مسافر کو دفتر بلا کر تعریفی سند بھی پیش کی۔ پولیس نے بس ڈرائیور کے خلاف مزید کارروائی کے لیے اس کا سراغ لگانے کی کوششیں شروع کر دی ہیں۔خوشاب بس کی بریک فیل کا واقعہ عوامی ٹرانسپورٹ میں گاڑیوں کے بریک اور دیگر اہم حفاظتی نظام کی باقاعدہ جانچ کی اہمیت بھی ظاہر کرتا ہے۔
