ایف بی آر اے آئی نظام کے ذریعے انکم ٹیکس ریٹرنز کی خودکار جانچ کا دائرہ بڑھا دیا گیا ہے۔ نئے نظام کے تحت ٹیکس ریٹرنز میں موجود ممکنہ غلطیوں، قانونی مسائل اور معلومات کے تضادات کی نشاندہی کی جائے گی۔ فیڈرل بورڈ آف ریونیو نے اس سلسلے میں انکم ٹیکس رولز 2002 میں ترمیم کرتے ہوئے الیکٹرانک اسکرونٹی کا طریقہ کار متعارف کرایا ہے۔ ایف بی آر اے آئی نظام ٹیکس ریٹرن میں فراہم کردہ معلومات کو ٹیکس حکام کے پاس دستیاب دیگر ڈیٹا کے ساتھ کراس میچ کرے گا۔ کسی تضاد کی صورت میں ٹیکس دہندہ کو فوری طور پر قانونی کارروائی کا سامنا نہیں ہوگا بلکہ پہلے وضاحت یا اصلاح کا موقع دیا جائے گا۔
ٹیکس دہندگان کو IRIS کے ذریعے آن لائن ایڈوائزری یا پیشگی اطلاع بھیجی جا سکے گی۔ نوٹس میں مسئلے کی نوعیت اور جواب دینے کی مدت درج ہوگی۔ نئے طریقہ کار کے تحت جواب کے لیے کم از کم سات دن کی مہلت دی جائے گی۔ اگر ٹیکس دہندہ مقررہ مدت میں جواب نہیں دیتا تو مزید کم از کم سات دن کی مہلت کے ساتھ یاد دہانی بھیجی جائے گی۔ ایف بی آر اے آئی نظام کا مقصد ٹیکس ریٹرنز کی جانچ کو زیادہ خودکار اور ڈیٹا پر مبنی بنانا ہے، جبکہ حتمی کارروائی متعلقہ ان لینڈ ریونیو افسر کی جانب سے کی جائے گی۔
