اسپین نے فیفا ورلڈ کپ 2026 جیت لیا اور 15 سال بعد ایک بار پھر دنیا کی بہترین فٹبال ٹیم ہونے کا اعزاز اپنے نام کر لیا۔ سنسنی خیز اور اعصاب شکن فائنل میں لا روخا نے دفاعی چیمپئن ارجنٹینا کو 1-0 سے شکست دے کر فیفا ورلڈ کپ 2026 کی ٹرافی اپنے نام کر لی۔ اس تاریخی کامیابی کے ساتھ اسپین نے اپنی تاریخ میں دوسری مرتبہ ورلڈ کپ جیتنے کا اعزاز حاصل کر لیا، جبکہ اس سے قبل اس نے 2010 میں عالمی ٹائٹل اپنے نام کیا تھا۔
ورلڈ کپ کے فائنل میں شائقین کو سخت مقابلہ دیکھنے کو ملا۔ مقررہ 90 منٹ تک دونوں ٹیمیں ایک دوسرے کے خلاف گول کرنے میں ناکام رہیں، جس کے بعد میچ ایکسٹرا ٹائم میں داخل ہوگیا۔ جہاں لاکھوں شائقین کی نظریں میدان پر جمی تھیں، وہیں اسپین کے اسٹار فارورڈ فیران ٹوریس نے ایسا فیصلہ کن وار کیا جس نے ارجنٹینا کے خواب چکنا چور کر دیے۔ ان کا گول ہی اسپین کی تاریخی فتح اور عالمی تاج کا سبب بنا۔
ارجنٹینا کی قیادت لیونل میسی کر رہے تھے، تاہم اسپین کی منظم حکمت عملی اور مضبوط دفاع کے سامنے وہ بھی بے بس دکھائی دیے۔ ہسپانوی کھلاڑیوں نے پورے میچ کے دوران گیند پر اپنی گرفت مضبوط رکھی، مسلسل خطرناک حملے کیے اور ارجنٹینا کو سنبھلنے کا موقع ہی نہ دیا۔
ورلڈ کپ جیتنے کے بعد اسپین بھر میں جشن کا سماں ہے۔ سڑکوں پر ہزاروں شائقین اپنی قومی ٹیم کی تاریخی فتح کا جشن منا رہے ہیں، جبکہ سوشل میڈیا پر بھی اسپین کی کامیابی دنیا بھر میں ٹاپ ٹرینڈ بن گئی ہے۔
