ایڈمنسٹریٹر

ایم کیو ایم پاکستان نے کراچی سمیت سندھ بھر میں ایڈمنسٹریٹر کی تعیناتیوں پرسوالات اٹھا دئیے

کراچی(ڈیلی مسلم ورلڈ ) ایم کیو ایم نے سندھ حکومت کی جانب سے ایڈمنسٹریٹر کی تعیناتی پر میرٹ کو نظر انداز کرنے کی مذمت کرتے ہوئے فیصلے کو پیپلز پارٹی کی بدنیتی قرار دے دیا۔

تفصیلات کے مطابق کراچی سمیت سندھ بھر میں ایڈمنسٹریٹر کی تعیناتیوں پر ایم کیو ایم پاکستان نے سوالات اٹھا دئیے، سندھ حکومت کی جانب سے ایڈمنسٹریٹر کی تعیناتی پر ایم کیو ایم پاکستان نے اظہار تشویش کرتے ہوئے ایڈمنسٹریٹرز کی تعیناتی میں میرٹ کو نظر انداز کرنے کی مذمت کی۔ ایڈمنسٹریٹرکی تعیناتی پر اپنے بیان میں ایم کیو ایم رابطہ کمیٹی نے کہا کہ فیصلے پر ایم کیو ایم پاکستان سے کوئی مشاورت نہیں کی گئی،

کراچی سمیت سندھ کے شہری علاقوں میں غیر مقامی اور اقربا پروری کی بنیاد پر ایڈمنسٹریٹرز کی تعیناتی کی مذمت کرتے ہیں۔ ایم کیو ایم نے مطالبہ کیا کہ چیف جسٹس،چیف جسٹس سندھ ہائی کورٹ اور ارباب اختیار نوٹس لیں ، سندھ میں ایڈمنسٹریٹر کی تعیناتی میں مقامی باشندوں کونظر انداز کیا گیا ہے۔ ایم کیو ایم پاکستان کا کہنا تھا کہ سندھ میں ایڈمنسٹریٹر کی تعیناتی میں مقامی باشندوں کونظر انداز کرنا تعصب ہے، اس قسم کے فیصلوں سے سندھ کے شہری علاقوں میں احساس محرومی بڑھے گا۔