پنجاب حکومت نے تاحیات پنشن کے حوالے سے ایک اہم فیصلہ کیا ہے اور سرکاری ملازمین کی بیواؤں اور غیر شادی شدہ بیٹیوں کے لیے تاحیات پنشن کی سہولت بحال کر دی ہے۔ اس فیصلے کا مقصد سرکاری ملازمین کی وفات کے بعد ان کے اہل خانہ کو مستقل مالی تحفظ فراہم کرنا ہے۔
پنجاب کی وزیراعلیٰ مریم نواز شریف کی منظوری کے بعد محکمہ خزانہ نے اس فیصلے کا باضابطہ نوٹیفکیشن جاری کر دیا ہے۔ نئی پالیسی کے تحت، پہلے سے نافذ 10 سالہ مدت کی حد ختم کر دی گئی ہے، جس کے بعد مستحق بیوائیں اور غیر شادی شدہ بیٹیاں تاحیات پنشن کی وصولی کی اہل ہوں گی۔
نوٹیفکیشن کے مطابق، تاحیات پنشن کی ادائیگی مقررہ قواعد و ضوابط کے تحت کی جائے گی۔ تاہم، اگر کوئی بیوہ دوبارہ شادی کر لیتی ہے تو اس کی پنشن فوری طور پر بند کر دی جائے گی۔
حکومت نے یہ بھی واضح کیا ہے کہ اگر کسی سرکاری ملازم کی ایک سے زیادہ بیوائیں ہوں تو پنشن کی کل رقم تمام مستحق بیواؤں میں مساوی طور پر تقسیم کی جائے گی۔
پنجاب حکومت کا کہنا ہے کہ اس فیصلے سے ہزاروں مستحق خاندانوں کو طویل مدتی مالی معاونت ملے گی اور سرکاری ملازمین کے اہل خانہ کو مالی مشکلات سے محفوظ رکھنے میں مدد ملے گی۔
