ٹرانسفارمرز پر اسمارٹ میٹرز

ٹرانسفارمرز پر اسمارٹ میٹرز لگانے کا فیصلہ، بجلی چوری روکنے کی تیاری

ٹرانسفارمرز پر اسمارٹ میٹرز لگانے کا فیصلہ کیا گیا ہے، جس کا مقصد بجلی چوری میں کمی، بلنگ کے نظام میں بہتری اور صارفین کو اضافی بلوں سے تحفظ فراہم کرنا ہے۔ یہ منصوبہ ملک کی تمام بجلی تقسیم کار کمپنیوں (ڈسکوز) میں متعارف کرانے کی منصوبہ بندی کی جا رہی ہے۔ وفاقی وزیر برائے اقتصادی امور و اسٹیبلشمنٹ ڈویژن احد چیمہ نے اسلام آباد میں اجلاس کی صدارت کرتے ہوئے بتایا کہ ٹرانسفارمرز پر اسمارٹ میٹرز کی تنصیب کے لیے مالی وسائل کے انتظام پر کام جاری ہے۔

وزارتِ اقتصادی امور کے مطابق اجلاس میں بجلی تقسیم کار کمپنیوں کے ترقیاتی منصوبوں اور اسمارٹ میٹرنگ نظام کے لیے بین الاقوامی مالیاتی شراکت داروں سے تعاون حاصل کرنے کے معاملات کا جائزہ لیا گیا۔ حکام کے مطابق ٹرانسفارمرز پر اسمارٹ میٹرز نصب ہونے سے بجلی کی تقسیم اور استعمال کی نگرانی بہتر بنانے میں مدد مل سکتی ہے۔ اس نظام کے ذریعے بجلی چوری کی نشاندہی اور بلنگ میں ممکنہ بے ضابطگیوں پر قابو پانے کی کوشش کی جائے گی۔

احد چیمہ نے واضح کیا کہ بجلی کمپنیوں کی نجکاری کا مقصد صارفین پر اضافی مالی بوجھ ڈالنا نہیں ہونا چاہیے۔ ان کے مطابق نجی سرمایہ کاروں کے نئے منصوبوں کے لیے مسابقتی بولی اور متعلقہ ریگولیٹری منظوری کے تقاضے بھی پورے کرنا ہوں گے۔ حکومت کے مطابق اسمارٹ میٹرنگ منصوبے کا مقصد صارفین کے مفادات کا تحفظ اور بجلی کے تقسیم کار نظام میں شفافیت بہتر بنانا ہے۔