لاہور(ڈیلی مسلم ورلڈ) ترجمان پنجاب حکومت مسرت جمشید چیمہ نے کہا ہے کہ سابقہ حکمران سادگی اور کفایت شعاری کی آڑ میں ملکی خزانے کو بے دردی سے لوٹتے رہے لیکن اب اس روایت کو ہمیشہ ہمیشہ کےلئے دفن کردیا ہے ،خواتین کوقومی دھارے میں شامل کیا جارہا ہے اور اس تناظر میں متعدد اقدامات اٹھائے گئے ہیں،پوری قوم ملک کو درپیش چیلنجز سے نبرد آزما ہونے کےلئے وزیراعظم عمران خان کے شانہ بشانہ ہے اور انہیں ہر طرح کی سپورٹ دینے کےلئے تیار ہے ۔
اپنے دفتر میں مختلف شعبہ ہائے زندگی سے تعلق رکھنے والی خواتین کے وفد سے ملاقات میں گفتگواور میڈیا کے لئے جاری کئے گئے اپنے ویڈیو بیان میں ترجمان پنجاب حکومت مسرت جمشید چیمہ نے کہا کہ اپوزیشن ملک و قوم کی ترقی و خوشحالی کی بجائے ہر وقت یہ دعائیں مانگتی رہتی ہے کہ اسے کسی نہ کسی طرح دوبارہ اقتدار کی باری مل جائے جس کے آئندہ تین سال اور اس کے بعد بھی کوئی آثار نظر نہیں آرہے ۔
اپوزیشن کو چیلنج ہے کہ صرف بیان بازی کرنے کی بجائے حکومت کے خلاف ٹھوس شواہد کے ساتھ کرپشن کا ایک بھی کیس سامنے لائے لیکن اسے سوائے ناکامی کے سوا کچھ نہیں ملے گا ۔ موجودہ حکومت نے کرپشن کے آگے بند باندھا دیا ہے جس کی وجہ سے اپوزیشن کو نہ دن اور نہ رات کو چین ہے ۔
ترجمان پنجاب حکومت مسرت جمشید چیمہ نے کہا کہ انشا اللہ بہت جلد صوبے میں میگا پراجیکٹس کا آغاز کیا جائے گا جس کا مقصد ماضی کے حکمرانو ں کی طرح اپنی جیبیں بھرنا نہیں بلکہ صوبے اور اس کی عوام کی زندگیوں میں خوشحالی لانا ہے
